ലോകത്തിലെ ഏറ്റവും വലി എണ്ണ കമ്പനിയും, ഏറ്റവും ലാഭമുള്ള കമ്പനിയുമായ സൗദി അരാംകോയുമായി മുകേഷ് അംബാനിയുടെ റിലയന്‍സ് ഇന്‍ഡസ്ട്രീസ് പരസ്പരം കൈകോര്‍ക്കുന്നുവെന്ന വാര്‍ത്തയോട് പ്രതികരിക്കാതെ റിലയന്‍സ്. അതേസമയം വിവിധ അവസരങ്ങളെ കമ്പനി വേണ്ട വിധത്തില്‍ ഉപയോഗപ്പെടുത്തുമെന്നാണ് കമ്പനി അധികൃതര്‍ നല്‍കുന്ന മറുപടി.
ലോകത്തിലെ ഏറ്റവും ഭീമന്‍ കമ്പനികളിലൊന്നായ സൗദി അരാംകോ റിലയന്‍സ് ഇന്‍ഡസ്ട്രീസിന്റെ പെട്രോ കെമിക്കല്‍സ് എണ്ണ ശുദ്ധീകരണ ശാലയുുടെ 25 ശതമാനം ഓഹരി വാങ്ങുമെന്ന വാര്‍ത്ത കഴിഞ്ഞ ദിവസം പുറത്തുവന്നിരുന്നു.അതേസമയം ഇതുമായി ബന്ധപ്പെട്ട് ഇരു വിഭാഗം കമ്പനികളുടെയും പ്രതിനിധികള്‍ ചര്‍ച്ച നടത്തിയെന്നാണ് വിവരം. ഓഹരി വാങ്ങാന്‍ സൗദി അരാംകോ തയ്യാറായാല്‍ 10 ബില്യണ്‍ ഡോളര്‍ മുതല്‍ 15 ബില്യണ്‍ ഡോളറിന്റെ ഇടപാടുകളാകും ഇരുവിഭാഗം കമ്പനികളും നടത്തുക.
ലോകത്തിലെ ഏറ്റവും വലിയ എണ്ണ ഉത്പാദന കമ്പനിയും, ഏറ്റവും ലാഭമുള്ള കമ്പനിയുമാണ് സൗദി അരാംകോ. ഇന്ത്യയില്‍ കൂടുതല്‍ എണ്ണ ഉത്പാദന പദ്ധതികള്‍ തുടങ്ങാന്‍ സൗദി കിരീടവകാശി മുഹമ്മദ് ബിന്‍ സല്‍മാന്‍ ഇന്ത്യാ സന്ദര്‍ശന വേളയില്‍ പറഞ്ഞിരുന്നു.
