ന്യൂഡല്‍ഹി: രാജ്യത്ത് റിലയന്‍സ് ഇന്റസ്ട്രീസിന്റെ ജിയോ സ്മാര്‍ട്ട്‌ഫോണ്‍ രംഗത്ത് നടത്താന്‍ പോകുന്ന വന്‍ നീക്കം മേഖലയില്‍ സ്വാധീനമുള്ള ചൈനീസ് കമ്പനികള്‍ക്ക് വന്‍ തിരിച്ചടിയാകുമെന്ന് റിപ്പോര്‍ട്ട്. ഗൂഗിള്‍ കൂടി ജിയോയ്ക്ക് ഒപ്പം കൈകോര്‍ക്കുന്നതോടെ ലോകത്തിലെ രണ്ടാമത്തെ വലിയ സ്മാര്‍ട്ട്‌ഫോണ്‍ മാര്‍ക്കറ്റിലെ ചൈനീസ് കമ്പനികളുടെ സ്വാധീനം നഷ്ടമാകുമെന്നാണ് വിദഗ്ദ്ധര്‍ വിലയിരുത്തുന്നത്.
കഴിഞ്ഞ ആഴ്ച നടന്ന കമ്പനിയുടെ വാര്‍ഷിക യോഗത്തില്‍ വച്ചാണ് മുകേഷ് അംബാനി സുപ്രധാന തീരുമാനം പ്രഖ്യാപിച്ചത്. ചെറിയ വിലയ്ക്ക് ലഭിക്കുന്ന 4ജി, 5ജി സ്മാര്‍ട്ട്‌ഫോണുകള്‍ക്കായി ഗൂഗിള്‍ ഒരു ആന്‍ഡ്രോയ്ഡ് ഓപ്പറേറ്റിങ് സിസ്റ്റം തയ്യാറാക്കുമെന്നായിരുന്നു പ്രഖ്യാപനം. ഇതിനെ പിന്‍പറ്റിയാണ് ഇപ്പോഴത്തെ നിഗമനങ്ങളിലേക്ക് വിദഗ്ദ്ധര്‍ എത്തിയിരിക്കുന്നത്.
നിലവില്‍ രാജ്യത്തെ പത്തില്‍ എട്ട് സ്മാര്‍ട്ട്‌ഫോണുകളും ചൈനീസ് കമ്പനികളുടേതാണ്. ഷവോമി, ബിബികെ ഇന്റസ്ട്രീസ് (റിയല്‍മി, ഒപ്പൊ, വിവോ) എന്നിവയ്ക്ക് ഇന്ത്യന്‍ വിപണിയില്‍ രണ്ട് ബില്യണ്‍ ഡോളറിന്റെ സ്വാധീനമുണ്ട്. ബജറ്റ് സ്മാര്‍ട്ട്‌ഫോണ്‍ വിപണിയിലേക്ക് റിലയന്‍സ് കടന്നുവന്നാല്‍ ഈ കമ്പനികളുടെ സ്വാധീനം നഷ്ടമാകുമെന്നാണ് വിലയിരുത്തപ്പെടുന്നത്.
റിലയന്‍സ് 2017 ല്‍ ജിയോ ഫോണ്‍ അവതരിപ്പിച്ചത് ഇതിന്റെ മുന്നോടിയായാണ് നോക്കിക്കാണുന്നത്. നിലവില്‍ രാജ്യത്തെ 10 കോടി പേര്‍ ജിയോയുടെ ഈ ഫീച്ചര്‍ ഫോണ്‍ ഉപയോഗിക്കുന്നുണ്ട്. പുതിയ സാഹചര്യത്തില്‍ ഇന്ത്യന്‍ വിപണിയില്‍ റിലയന്‍സ് സ്മാര്‍ട്ട്‌ഫോണ്‍ അവതരിപ്പിച്ചാല്‍ അത് വലിയ വിജയമായിരിക്കും എന്നാണ് പ്രതീക്ഷ. റിലയന്‍സിനോട് കിടപിടിക്കാന്‍ ചൈനീസ് കമ്പനികള്‍ വന്‍ വിലക്കുറവ് പ്രഖ്യാപിക്കേണ്ടി വരുമെന്നും എങ്കിലും റിലയന്‍സ് വിപണി കീഴടക്കാന്‍ തന്നെയാണ് സാധ്യതയെന്നുമാണ് വിലയിരുത്തല്‍.
