ഇന്ത്യയുടെ റീട്ടെയില്‍ വിഭാഗത്തില്‍ സ്ഥാനം ഉയര്‍ത്താന്‍ റിലയന്‍സ് ഇന്‍ഡസ്ട്രീസ് ലിമിറ്റഡ് (ആര്‍ഐഎല്‍) ഫ്യൂച്ചര്‍ ഗ്രൂപ്പിന്റെ റീട്ടെയില്‍ ആസ്തി 24,000 മുതല്‍ 27,000 കോടി രൂപയ്ക്ക് വാങ്ങാന്‍ പദ്ധതിയിടുന്നതായി റിപ്പോര്‍ട്ട്. ഇതില്‍ ഫ്യൂച്ചര്‍ ഗ്രൂപ്പിന്റെ ബാധ്യതകള്‍ കൂടി ഉള്‍പ്പെടുന്നു. ഫ്യൂച്ചര്‍ റീട്ടെയില്‍ ലിമിറ്റഡ്, ഫ്യൂച്ചര്‍ കണ്‍സ്യൂമര്‍, ഫ്യൂച്ചര്‍ ലൈഫ് സ്‌റ്റൈല്‍ ഫാഷനുകള്‍, ഫ്യൂച്ചര്‍ സപ്ലൈ ചെയിന്‍, ഫ്യൂച്ചര്‍ മാര്‍ക്കറ്റ് നെറ്റ്വര്‍ക്കുകള്‍ എന്നിവ ഉള്‍പ്പെടെ അഞ്ച് ലിസ്റ്റുചെയ്ത എന്റിറ്റികള്‍ ആസ്തികള്‍ വില്‍ക്കുന്നതിന് മുമ്പ് ഫ്യൂച്ചര്‍ എന്റര്‍പ്രൈസസ് ലിമിറ്റഡില്‍ (എഫ്ഇഎല്‍) ലയിപ്പിക്കുമെന്നാണ് അനൌദ്യോഗിക റിപ്പോര്‍ട്ട്. ജൂലൈ 31 വരെ ആര്‍ഐഎല്‍ കരാര്‍ സംബന്ധിച്ച കാര്യങ്ങള്‍ പുറത്തുവിടില്ലെന്നാണ് വിവരം.
നിലവില്‍ ചര്‍ച്ചകള്‍ നടക്കുന്നുണ്ടെന്നും കരാര്‍ സംബന്ധിച്ച അന്തിമ തീരുമാനമെടുക്കാന്‍ സമയമെടുക്കുമെന്നുമാണ് വിവരം. കമ്പനി വെബ്സൈറ്റ് അനുസരിച്ച്, ഗ്രൂപ്പിനായുള്ള റീട്ടെയില്‍ ഇന്‍ഫ്രാസ്ട്രക്ചര്‍ ഫ്യൂച്ചര്‍ എന്റര്‍പ്രൈസസ് ലിമിറ്റഡ് വികസിപ്പിക്കുകയും സ്വന്തമാക്കുകയും പാട്ടത്തിന് നല്‍കുകയും ചെയ്യുന്നു. ഇന്‍ഷുറന്‍സ്, ടെക്‌സ്‌റ്റൈല്‍ നിര്‍മ്മാണം, വിതരണ ശൃംഖല, ലോജിസ്റ്റിക്‌സ് എന്നിവയുള്‍പ്പെടെയുള്ള സബ്‌സിഡിയറികളിലും സംയുക്ത സംരംഭങ്ങളിലും ഗ്രൂപ്പ് നിക്ഷേപം നടത്തുന്നുണ്ട്.
ഇടപാടിന്റെ ഭാഗമായി, ഫ്യൂച്ചര്‍ ഗ്രൂപ്പിന്റെ ലിസ്റ്റുചെയ്ത സ്ഥാപനങ്ങളായ ബിഗ് ബസാര്‍, ഫുഡ്ഹാള്‍, നീലഗിരിസ്, എഫ്ബിബി, സെന്‍ട്രല്‍, ഹെറിറ്റേജ് ഫുഡ്‌സ്, ബ്രാന്‍ഡ് ഫാക്ടറി എന്നിവയില്‍ നിന്നുള്ള ഫാഷന്‍, പലചരക്ക് റീട്ടെയില്‍ ഫോര്‍മാറ്റുകള്‍, വസ്ത്ര ബ്രാന്‍ഡുകളായ ലീ കൂപ്പര്‍, തുടങ്ങിയവയെല്ലാം ആര്‍ഐഎല്‍ ഏറ്റെടുക്കും. 1,700ഓളം സ്റ്റോറുകള്‍ ആര്‍ഐഎല്‍ ഏറ്റെടുക്കുമെന്നാണ് പ്രതീക്ഷിക്കുന്നത്.
കിഷോര്‍ ബിയാനി സ്ഥാപിച്ച ഫ്യൂച്ചര്‍ ഗ്രൂപ്പ് വര്‍ഷങ്ങളായി നേരിട്ട് വരുന്ന കനത്ത കടത്തിന്റെ സമയത്താണ് പുതിയ കരാര്‍. 2019 സെപ്റ്റംബര്‍ 30 ലെ കണക്കനുസരിച്ച്, ഫ്യൂച്ചര്‍ ഗ്രൂപ്പിന്റെ ലിസ്റ്റുചെയ്ത കമ്പനികളിലെ കടം 2019 മാര്‍ച്ച് 31 വരെ 10,951 കോടിയില്‍ നിന്ന് 12,778 കോടി രൂപയായി ഉയര്‍ന്നു. 1980 കളുടെ അവസാനം മുതല്‍ ബിയാനി സംഘടിത ചില്ലറ വ്യാപാരം നടത്തി വരുന്നു. 1991 ല്‍ ബിയാനി തന്റെ കമ്പനിയുടെ പേര് പാന്റലൂണ്‍ ഫാഷന്‍ (ഇന്ത്യ) ലിമിറ്റഡ് എന്ന് മാറ്റിയിരുന്നു. 2001ല്‍ ഇന്ത്യയിലെ ആദ്യത്തെ ബിഗ് ബസാര്‍ സ്റ്റോര്‍ തുറന്നു.
ഫാഷന്‍, പാദരക്ഷകള്‍, പ്രീമിയം ഫാഷന്‍, പലചരക്ക്, ആഭരണങ്ങള്‍, ഇലക്ട്രോണിക്സ്, കണക്റ്റിവിറ്റി മുതലായവ വിഭജിച്ച് 11,784 സ്റ്റോറുകള്‍ പ്രവര്‍ത്തിപ്പിക്കാനാണ് റിലയന്‍സ് റീട്ടെയില്‍ പദ്ധതിയിടുന്നത്. 2020 സാമ്പത്തിക വര്‍ഷം റിലയന്‍സ് റീട്ടെയില്‍ 1.63 ട്രില്യണ്‍ ഡോളര്‍ വിറ്റുവരവ് നേടി. ഫ്യൂച്ചര്‍ റീട്ടെയില്‍ ഇന്ത്യയില്‍ 7-ഇലവന്‍ സ്റ്റോറുകള്‍ വികസിപ്പിക്കുന്നതിനും പ്രവര്‍ത്തിപ്പിക്കുന്നതിനുമായി 7-ഇലവന്‍ ഇങ്കുമായി ഒരു മാസ്റ്റര്‍ ഫ്രാഞ്ചൈസി കരാര്‍ ഒപ്പിട്ടിരുന്നു. എന്നാല്‍ ഇതുവരെ സ്റ്റോറുകളൊന്നും തുറന്നിട്ടില്ല, എന്നാല്‍ ഈ ബിസിനസ്സും റിലയന്‍സിലേക്ക് പോകുമെന്നാണ് പ്രതീക്ഷിക്കുന്നത്.
