ന്യൂഡല്‍ഹി: പതജ്ഞലി ഗ്രൂപ്പ് മേധാവി ബാബാ രാംദേവിനെ അപകീര്‍ത്തിപ്പെടുന്ന വീഡിയോ നീക്കം ചെയ്യാന്‍ സമൂഹമാധ്യമങ്ങള്‍ക്ക് ഡല്‍ഹി ഹൈക്കോടതിയുടെ നിര്‍ദ്ദേശം. ഫേസ്ബുക്ക്, ട്വിറ്റര്‍, ഗൂഗ്ള്‍, യൂ ട്യൂബ് അധികൃതര്‍ക്കാണ് ഡല്‍ഹി ഹൈക്കോടതി ജസ്റ്റിസ് പ്രതിഭ എം സിങ് നിര്‍ദ്ദേശം നല്‍കിയത്. ബാബാ രാംദേവ് നല്‍കിയ പരാതിയിലാണ് കോടതിയുടെ ഇടപെടല്‍.
അപകീര്‍ത്തിപ്പെടുത്തുന്ന തരത്തിലുള്ള ലിങ്കുകളും ഫോട്ടോകളും വീഡിയോകളുമടക്കം എല്ലാം ആഗോള തലത്തില്‍ മാറ്റണമെന്നാണ് നിര്‍ദ്ദേശം.ഗോഡ്മാന്‍ ടു ടൈക്കൂണ്‍ എന്ന പുസ്തകത്തില്‍ തനിക്കെതിരെ അപകീര്‍ത്തികരമായ ഉള്ളടക്കമുണ്ടെന്നും ഇത് വീഡിയോ ആയും മറ്റ് രൂപത്തിലും സോഷ്യല്‍ മീഡിയയില്‍ പ്രചരിക്കുകയാണെന്നും രാം ദേവ് പരാതിയില്‍ പറയുന്നു.
ഇന്ത്യയില്‍ മാത്രമല്ല, ലോകത്താകമാനം അപകീര്‍ത്തി ഉള്ളടക്കങ്ങള്‍ തടയണമെന്ന് കോടതി നിര്‍ദ്ദേശിച്ചു. തെറ്റായ വിവരങ്ങളും അപകീര്‍ത്തിപ്പെടുത്തുന്ന വിവരങ്ങളും ആര്‍ക്കും ലഭ്യമാകരുത്. ഇതിനുള്ള ഉത്തരവാദിത്തം സോഷ്യല്‍മീഡിയ പ്ലാറ്റ്‌ഫോമുകള്‍ക്കാണെന്നും ജഡ്ജി വ്യക്തമാക്കി.ഗോഡ്മാന്‍ ടു ടൈക്കൂണ്‍ എന്ന പുസ്തകത്തിന്റെ പ്രസാദകരെ നേരത്തെ കോടതി വിലക്കിയിരിന്നു.
എന്നാല്‍ ബാബാ രാംദേവിനെ ട്രോളിയുള്ള വീഡിയോകള്‍ പ്രചരിക്കുന്നത് മൂലം പതജ്ഞലിയുടെ ബിസനസ്സിനെ ഗുരുതരമായി ബാധിക്കുന്നുണ്ടെന്നാണ് കമ്പനി അധികൃതര്‍ വ്യക്തമാക്കുന്നത്.
