മുംബൈ: അടുത്ത ഏഴ് വര്‍ഷത്തിനുള്ളില്‍ കുറഞ്ഞത് 28 പുതിയ ബൈക്കുകള്‍ വിപണിയിലിറക്കാന്‍ റോയല്‍ എന്‍ഫീല്‍ഡ് തീരുമാനിച്ചു. ഓരോ സാമ്പത്തിക പാദത്തിലും ഓരോന്ന് എന്ന കണക്കില്‍ ബൈക്കുകള്‍ ഇറക്കാനാണ് ആലോചന. അടുത്ത 12 മാസത്തിനുള്ളില്‍ ഇതിനായി തായ്ലന്റില്‍ ഒരു പ്ലാന്റ് തുറക്കും. പിന്നാലെ ബ്രസീലില്‍ നിര്‍മ്മാണ യൂണിറ്റ് തുറക്കാനും കമ്പനി തീരുമാനിച്ചു.
250 സിസി മുതല്‍ 750 സിസി വരെയുള്ള മോഡലുകളാവും പുറത്തിറക്കുക. എത്ര രൂപയാണ് ഇതിനായി നിക്ഷേപിക്കുന്നതെന്ന് കമ്പനി വെളിപ്പെടുത്തിയിട്ടില്ല. അടുത്ത മൂന്ന് വര്‍ഷത്തേക്കുള്ള ആവശ്യമായ ഉല്‍പാദന ശേഷി നിലവിലുണ്ട്.
ഈ സാമ്പത്തിക വര്‍ഷത്തിലെ ആദ്യത്തെ നാല് മാസം കൊവിഡ് മൂലം കനത്ത തിരിച്ചടിയാണ് കമ്പനി നേരിട്ടത്. എന്നാല്‍ കൊവിഡിന് മുന്‍പത്തേക്കാള്‍ മികവുറ്റതായി ഇപ്പോഴത്തെ ബുക്കിങ് നിലവാരം. അന്താരാഷ്ട്ര വിപണിയില്‍ കമ്പനി മികച്ച നേട്ടമുണ്ടാക്കുന്നുണ്ടെന്നും കമ്പനി വ്യക്തമാക്കി.
