ആഡംബരങ്ങളോട് ഏവര്‍ക്കും പ്രിയമാണ്, പ്രത്യേകിച്ച് കാറുകളോട്. എന്തുവില കൊടുത്തും ആഡംബര കാറുകള്‍ സ്വന്തമാക്കാനാഗ്രഹിക്കുന്ന വലിയൊരു ആഡംബര കാര്‍ പ്രേമികള്‍ തന്നെ നമുക്കിടയിലുണ്ട്. അവര്‍ക്കൊക്കെയും ഏറെ ആഹ്ലാദം പകരുന്ന റിപ്പോര്‍ട്ടുകളാണ് പുറത്തുവരുന്നത്. ഒട്ടും വൈകാതെ തന്നെ ഇന്ത്യന്‍ വാഹന വിപണിയിലേക്ക് ആഡംബര കാറുകളുടെ കുത്തൊഴുക്ക് തന്നെയുണ്ടാകുമെന്നാണ് റിപ്പോര്‍ട്ടുകള്‍.

കോവിഡിന്റെ പശ്ചാത്തലത്തില്‍ ഏര്‍പ്പെടുത്തിയ ലോക്ക്ഡൗണ്‍ പിന്‍വലിക്കുമ്പോള്‍ 'ഒരു പ്രതികാര വാങ്ങല്‍' സൂപ്പര്‍ ആഡംബര കാര്‍ വിപണിയിലുണ്ടാകുമെന്നാണ് പ്രതീക്ഷിക്കുന്നത്. ഈ വിപണി പ്രതീക്ഷിച്ച് അത്യാഡംബര വാഹനങ്ങളായ മെഴ്സിഡീസ് ബെന്‍സിന്റെ മെയ്ബാക്ക് ജിഎല്‍എസ് 600, ലംബോര്‍ഗിനിയുടെ ഹുറാക്കന്‍ ഇവോ ആര്‍ഡബ്ല്യുഡി സ്പൈഡര്‍ എന്നിവ ഇന്ത്യയില്‍ അവതരിപ്പിച്ചിരിക്കുകയാണ് കമ്പനികള്‍. മെഴ്സിഡീസ് മെയ്ബാക്ക് ജിഎല്‍എസ് 600 ന് 2.43 കോടി രൂപയും ലംബോര്‍ഗിനി ഹുറാക്കന്‍ ഇവോ ആര്‍ഡബ്ല്യുഡി സ്പൈഡറിന് 3.54 കോടി രൂപയുമാണ് ഇന്ത്യയിലെ എക്സ് ഷോറൂം വില നിശ്ചയിച്ചിരിക്കുന്നത്.

2021 ഇന്ത്യയിലെ റെക്കോര്‍ഡ് വില്‍പ്പനയുടെ വര്‍ഷമായിരിക്കുമെന്നാണ് ആഡംബര കാര്‍ നിര്‍മാതാക്കളായ ലംബോര്‍ഗിനിയുടെ പ്രതീക്ഷ. അതേസമയം ഇന്ത്യയിലേക്ക് അനുവദിച്ച മെയ്ബാക്ക് ജിഎല്‍എസ് 600 ന്റെ 50 യൂണിറ്റുകളും വിപണിയിലെത്തുന്നതിന് മുമ്പുതന്നെ ബുക്കിംഗ് ചെയ്തതായി മെഴ്‌സിഡീസ് ബെന്‍സ് പറഞ്ഞു. അടുത്ത സെറ്റ് 2022ലെ ഒന്നാം പാദത്തോടെ തയാറാകുമെന്നും ഉപഭോക്താക്കളിലേക്കെത്തിക്കുമെന്നും കമ്പനി വ്യക്തമാക്കിയിട്ടുണ്ട്. ഈ മോഡലിനായി വിപണിയില്‍ ശക്തമായ ഡിമാന്റ് തുടരുന്നുണ്ടെന്ന് മെഴ്‌സിഡീസ് ബെന്‍സ് ഇന്ത്യയിലെ വൈസ് പ്രസിഡന്റ് (സെയില്‍സ് & മാര്‍ക്കറ്റിംഗ്) സന്തോഷ് അയ്യര്‍ പറഞ്ഞു. ''

കാര്‍ വാങ്ങിയവരില്‍ ഭൂരിഭാഗവും ചലച്ചിത്രമേഖലയിലെ ആളുകള്‍, ക്രിക്കറ്റ് താരങ്ങള്‍, ബിസിനസ് വ്യവസായികള്‍ തുടങ്ങിയ താരങ്ങളാണ്'' അദ്ദേഹം കൂട്ടിച്ചേര്‍ത്തു. 250 കിലോമീറ്റര്‍ വേഗത കമ്പനി അവകാശപ്പെടുന്ന മെയ്്ബാക്ക് ജിഎല്‍എസ് 600ന് നാല് മിനുട്ടിനുള്ളില്‍ 100 കിലോമീറ്റര്‍ വേഗത കൈവരിക്കാനാകും. അതേസമയം റൂഫില്ലാതെയാണ് ലംബോര്‍ഗിനിയുടെ ഇവോ സ്പൈഡര്‍ പുറത്തിറക്കിയിട്ടുള്ളത്. 3.5 സെക്കന്റിനുള്ളില്‍ 100 കിലോമീറ്റര്‍ കൈവരിക്കാനാകുമെന്നാണ് കമ്പനിയുടെ വാഗ്ദാനം. കൂടാതെ മണിക്കൂറില്‍ 324 കിലോമീറ്റര്‍ വേഗതയും കമ്പനി അവകാശപ്പെടുന്നു.