മുംബൈ: ടാറ്റാ കണ്‍സള്‍ടന്‍സി സര്‍വീസസ് (ടിസിഎസ്)ലോകത്തിലെ മൂന്നാമത്തെ ഭീമന്‍ ഐടി കമ്പനിയായി ഇനി അറിയപ്പെടും. ഡിഎക്‌സ്‌സി ടെക്‌നോളജി കമ്പനിയെ ടിസിഎസ് മറികടക്കുമെന്നാണ് റിപ്പോര്‍ട്ട്. രണ്ട് വര്‍ഷത്തിനിടെ ഐടി മേഖലയില്‍ ഉണ്ടായ മാറ്റങ്ങളും കമ്പനിയുടെ മാനേജ്‌മെന്റ് തലത്തിലുള്ള അഴിച്ചുപണിയും കൂടുതല്‍ വരുമാന നേട്ടം ഉണ്ടാകുന്നതിന് കാരണമായി. 2018-2019 സാമ്പത്തിക വര്‍ഷം ടിസിഎസ് വരുമാനത്തില്‍ ഡിഎക്‌സിസിയെ പിന്നിലാക്കി നേട്ടം കൊയ്താല്‍ ഐബിഎം അടക്കമുള്ള കമ്പനികളാകും ടിസിഎസിന് മുന്‍പിലുണ്ടാവുക.
അതേസമയം ടിസിഎസിന്റെ വരുമാനത്തില്‍ വന്‍ വര്‍ധനവാണ് ഉണ്ടായിട്ടുള്ളത്.നാലാംപാദത്തില്‍ 9.6 ശതമാനമാണ് വരുമാനത്തില്‍ വര്‍ധനവുണ്ടായിട്ടുള്ളത്. 20.91 ബില്യണ്‍ ഡോളര്‍ വരുമാനമാണ് കമ്പനി ആകെ നേടിയത്. എന്നാല്‍ കമ്പനിയുടെ നാലാം പാദത്തിലെ ആകെ വരുമാനം 1.82 ബില്യണ്‍ ഡോളറെന്നാണ് കണക്കുകളിലൂടെ വ്യക്തമാക്കുന്നത്.
ടിസിഎസിന്റെ കഴിഞ്ഞ സാമ്പത്തിക വര്‍ഷത്തിലെ ആകെ വരുമാനം 15.52 ബില്യണ്‍ ഡോളര്‍ വരുമാനമാണ് ഉണ്ടായിരുന്നത്. ഡിക്‌സിസി ആവട്ടെ 15.47 ബില്യണ്‍ ഡോളര്‍ വരുമാനമാണ് അന്ന് നേടിയത്. കമ്പനിയിലുണ്ടായ ചില മാറ്റങ്ങളാണ് ടിസിഎസിന് കൂടുതല്‍ വരുമാനം ഉണ്ടാകുന്നതിന് കാരണമായത്. വരുമാനത്തില്‍ വന്‍വര്‍ധനവുണ്ടായതോടെ ടിസിഎസ് ലോകത്തിലെ ഏറ്റവും വലിയ ഐടി ഭീമന്‍ കമ്പനിയായി മാറുമെന്നാണ് നിരീക്ഷകര്‍ വിലയിരുത്തുന്നത്. അതേസമയം ഡിക്‌സിസി മാര്‍ച്ച് പാദത്തില്‍ നേടിയ വരുമാനത്തെ പറ്റിയുള്ള കണക്കുകള്‍ ഇതുവരെയും പുറത്തുവിട്ടിട്ടില്ല. മെയ് 23 നാണ് കമ്പനി പുതിയ കണക്കുകള്‍ പുറത്തുവിടുക.
