തിരുവനന്തപുരം: കേരളത്തില്‍ വന്‍ നിക്ഷേപത്തിനൊരുങ്ങി ദുബായ് ആസ്ഥാനമായ ട്രൈസ്റ്റാര്‍ ഗ്രൂപ്പ്. മീറ്റ് ദി ഇന്‍വസ്റ്റര്‍ പരിപാടിയുടെ ഭാഗമായി ദുബായ് എക്‌സ്‌പോ 2020 വേദിയില്‍ വച്ച് നടന്ന ചര്‍ച്ചയുടെ തുടര്‍ച്ചയായിരുന്നു ഇത്തവണത്തെ കൂടിക്കാഴ്ച ആദ്യഘട്ടത്തില്‍ എണ്ണ സംഭരിക്കാവുന്ന അഞ്ച് ഹൈടെക് ഫ്യുവല്‍ സ്റ്റേഷന്‍ സ്ഥാപിക്കാന്‍ വ്യവസായമന്ത്രി പി രാജീവുമായി കമ്പനി അധികൃതര്‍ നടത്തിയ ചര്‍ച്ചയില്‍ ധാരണയായി.
മീറ്റ് ദ ഇന്‍വെസ്റ്റര്‍ പരിപാടിയുടെ ഭാഗമായി ദുബായ് എക്സ്പോയില്‍ നടന്ന ചര്‍ച്ചയുടെ തുടര്‍ച്ചയായിരുന്നു കൂടിക്കാഴ്ച. മിഡില്‍ ഈസ്റ്റ്, ആഫ്രിക്ക, ഏഷ്യ, പസഫിക്, അമേരിക്ക എന്നിങ്ങനെ 21 രാജ്യങ്ങളില്‍ പ്രവര്‍ത്തിക്കുന്ന ട്രൈസ്റ്റാര്‍ ട്രാന്‍സ്പോര്‍ട്ടിങ് മേഖലയിലെ ലോകത്തിലെ ഒരു പ്രമുഖ കമ്പനിയാണ്. രണ്ടാംഘട്ടത്തില്‍ ലൊജിസ്റ്റിക് പാര്‍ക്കുകളും മൂന്നാംഘട്ടത്തില്‍ ഹൈടെക് വെയര്‍ ഹൗസുകളും നാലാംഘട്ടത്തില്‍ പെട്രോ പാര്‍ക്കുകളും സ്ഥാപിക്കാനാണ് ട്രൈസ്റ്റാര്‍ ഒരുങ്ങുന്നത്.
നാലു ഘട്ടവും പൂര്‍ത്തിയാകുന്നതോടെ ദുബായ്ക്ക് പുറത്ത് ട്രൈസ്റ്റാര്‍ ഗ്രൂപ്പിന്റെ ഏറ്റവും വലിയ നിക്ഷേപകേന്ദ്രമായി കേരളം മാറും. ട്രൈസ്റ്റാര്‍ അധികൃതര്‍ കേരളത്തില്‍ നിക്ഷേപം നടത്തുന്നതിന് അതീവ തല്‍പരരാണെന്ന് ചര്‍ച്ചയില്‍ അഭിപ്രായപ്പെട്ടു. ആയിരക്കണക്കിന് തൊഴിലവസരങ്ങളും സൃഷ്ടിക്കപ്പെടും. കമ്പനിക്കാവശ്യമായ നിയമപരമായ എല്ലാ സഹായവും സര്‍ക്കാരിന്റെ ഭാഗത്തുനിന്ന് ലഭ്യമാക്കുമെന്ന് മന്ത്രി പി രാജീവ് അറിയിച്ചു. പെട്രോ കെമിക്കല്‍ മേഖലയില്‍ തെക്കന്‍ ഏഷ്യയിലെ തന്നെ സുപ്രധാന വ്യാപാര കേന്ദ്രമായി കേരളം മാറും.
