ന്യൂഡല്‍ഹി: കടുത്ത സാമ്പത്തിക പ്രതിസന്ധിയില്‍ വലയുന്ന വോഡഫോണ്‍-ഐഡിയ വിപണിയില്‍ പിടിച്ചു നില്‍ക്കാന്‍ അവസാന ശ്രമവുമായി രംഗത്ത്. സ്വകാര്യ ഇക്വിറ്റി നിക്ഷേപകരുടെ സഹായത്തോടെ പ്രതിസന്ധി മറികടക്കാനാണ് കമ്പനിയുടെ ശ്രമം. ടെലികോം കമ്പനികള്‍ തമ്മില്‍ താരിഫ് യുദ്ധം കടുത്തതോടെയാണ് വോഡഫോണ്‍-ഐഡിയ വലിയ പ്രതിസന്ധിയിലേക്ക് നീങ്ങിയത്.
ടെലികോം കമ്പനികള്‍ക്ക് ഫണ്ട് നല്‍കുന്ന അപ്പോളോ ഗ്ലോബല്‍ മാനേജ്‌മെന്റ് എന്ന സ്ഥാപനവുമായി കരാറിലെത്താനാണ് കമ്പനിയുടെ ശ്രമം. 22,400 കോടിയാണ് അപ്പോളോ വോഡഫോണ്‍-ഐഡിയയില്‍ നിക്ഷേപിക്കുക. എന്നാല്‍, ഇടപാടിനെ കുറിച്ചുള്ള കൂടുതല്‍ വിവരങ്ങള്‍ പുറത്ത് വന്നിട്ടില്ല.
സാമ്പത്തിക പ്രതിസന്ധി മറികടക്കാന്‍ ബ്രോഡ്ബാന്‍ഡ്, ഒപ്?ടിക്കല്‍ ഫൈബര്‍, ഡാറ്റ സെന്റര്‍ എന്നിവയുടെ വില്‍പന നടത്താനും വോഡഫോണ്‍-ഐഡിയക്ക് പദ്ധതിയുണ്ട്. നിലവില്‍ കമ്പനിയില്‍ വോഡഫോണിന് 44.39 ശതമാനവും ഐഡിയക്ക് 27.66 ശതമാനം ഓഹരിയുമാണ് ഉള്ളത്.
