ന്യൂഡല്‍ഹി: മുകേഷ് അംബാനിയുടെയും ഗൗതം അദാനിയുടെയും പൂനാവാലെമാരുടെയും ആസ്തികള്‍ വര്‍ധിച്ചെങ്കിലും 2020 ഇന്ത്യയിലെ അതിസമ്പന്നര്‍ക്ക് തിരിച്ചടിയുടെ വര്‍ഷമായിരുന്നു. ഇന്ത്യയിലെ അതിസമ്പന്നരുടെ ആകെ ആസ്തിയില്‍ 2020 ല്‍ 4.4 ശതമാനം ഇടിവുണ്ടായി. 12.83 ലക്ഷം കോടി ഡോളറാണ് ഇന്ത്യയിലെ അതിസമ്പന്നരുടെ സംയോജിത ആസ്തി.
ദശലക്ഷം ഡോളര്‍ ആസ്തിയുള്ള ഇന്ത്യാക്കാരുടെ എണ്ണം 764000ത്തില്‍ നിന്ന് 698000ത്തിലേക്ക് താഴ്ന്നു. ഇതിനെല്ലാം കാരണമായതോ ഡോളറിനെതിരെ ഇന്ത്യന്‍ രൂപയുടെ മൂല്യം ഇടിഞ്ഞതും. 594 ബില്യണ്‍ ഡോളര്‍ ആസ്തിയാണ് ഇടിഞ്ഞത്.
ലോകത്തെ അതിസമ്പന്നരില്‍ വെറും ഒരു ശതമാനമാണ് ഇന്ത്യയിലുള്ളത്. എന്നാല്‍ ഇന്ത്യയിലെ അതിസമ്പന്നരുടെ എണ്ണം 2025 ആകുമ്പോഴേക്ക് 81.8 ശതമാനം വര്‍ധിക്കുമെന്ന് ക്രെഡിറ്റ് സ്യൂസ്സെ റിസര്‍ച്ച് ഇന്‍സ്റ്റിറ്റ്യൂട്ടിന്റെ റിപ്പോര്‍ട്ടില്‍ പറയുന്നുണ്ട്. 2025 ല്‍ ഇന്ത്യയില്‍ 13 ലക്ഷം അതിസമ്പന്നരുണ്ടാകുമെന്നാണ് റിപ്പോര്‍ട്ട് പറയുന്നത്.
