വാഷിങ്ടണ്‍: ഇന്ത്യയിലെ ഈ വര്‍ഷത്തെ സാമ്പത്തിക വളര്‍ച്ചാ നിരക്ക് ആറ് ശതമാനമായി ചുരുങ്ങുമെന്ന്‌ലാക ബാങ്ക്. 2018-19 സാമ്പത്തികവര്‍ഷത്തില്‍ 6.9 ശതമാനമായിരുന്നു വളര്‍ച്ചനിരക്ക്. ദക്ഷിണേഷ്യാ സാമ്പത്തിക റിപ്പോര്‍ട്ടിന്റെ ഏറ്റവും പുതിയ ലക്കത്തിലാണ് ഇന്ത്യയുടെ വളര്‍ച്ചനിരക്കില്‍ ലോകബാങ്ക് കുറവുവരുത്തിയത്. ഇത് പ്രകാരം ഇന്ത്യ നേപ്പാള്‍, ബംഗ്ലാദേശ്, ഭൂട്ടാന്‍ എന്നീ രാജ്യങ്ങളേക്കാള്‍ പിന്നിലാണ്. ബംഗ്ലാദേശ് 8.1 %, ഭൂട്ടാന്‍ 7.4 %, നേപ്പാള്‍ 6.5 % എന്നിങ്ങനെയാകും വളര്‍ച്ച. എന്നാല്‍ ഇവ മൂന്നും ചെറിയ സമ്പദ്വ്യവസ്ഥകളാണെന്നതും മറ്റൊരു ഘടകമാണ്. ഇന്ത്യയ്ക്ക് നേരത്തേ ലോകബാങ്ക് അനുമാനിച്ചിരുന്നത് 6.9 % വളര്‍ച്ചയാണ്. ഇന്ത്യയുടെ വളര്‍ച്ച 2021 ല്‍ 6.9 ശതമാനവും 2022 ല്‍ 7.2 ശതമാനവുമായി വര്‍ധിക്കുമെന്നും ബാങ്ക് പറയുന്നു. വിവിധ റേറ്റങ് ഏജന്‍സികളും നടപ്പുവര്‍ഷം ഇന്ത്യ പ്രതീക്ഷിച്ച വളര്‍ച്ചാ നിരക്ക് രേഖപ്പെടുത്തില്ലെന്നാണ് വിലയിരുത്തിയിട്ടുള്ളത്.
ദക്ഷിണേഷ്യന്‍ രാജ്യങ്ങളിലെ ഏറ്റവും കുറഞ്ഞ നിരക്കാണിത്. മാന്ദ്യം പിടിമുറുക്കിയെന്ന് വെളിപ്പെടുത്തുന്നതാണ് ലോകബാങ്കിന്റെ ദക്ഷിണേഷ്യന്‍ രാജ്യങ്ങളിലെ സാമ്പത്തികസ്ഥിതിയെ കുറിച്ചുള്ള റിപ്പോര്‍ട്ട്. നോട്ടുനിരോധനവും തയ്യാറെടുപ്പില്ലാതെ കൊണ്ടുവന്ന ചരക്ക് സേവന നികുതിയുമാണ് തകര്‍ച്ചയ്ക്ക് കാരണം. രാജ്യത്തെ ദാരിദ്ര്യം വര്‍ധിക്കും. കറന്റ് അക്കൗണ്ട് കമ്മി മൊത്ത ആഭ്യന്തര ഉല്‍പ്പാദനത്തിന്റെ (ജിഡിപി) 2.1 ശതമാനമായി വര്‍ധിച്ചു. കേന്ദ്രസര്‍ക്കാരിന്റെ പൊതുകടം വര്‍ധിച്ച് ജിഡിപിയുടെ 5.9 ശതമാനമായി. ഇത്രമേല്‍ ദുര്‍ബലമായ സാഹചര്യം സാമ്പത്തികരംഗത്ത് ഘടനാപരമായ പ്രതിസന്ധിക്ക് കാരണമാകുമെന്നും വളര്‍ച്ചയെ കാര്യമായി പിന്നോട്ടടിക്കുമെന്നും റിപ്പോര്‍ട്ട് വെളിപ്പെടുത്തി. പ്രധാനമന്ത്രി മോദിക്കും ധനമന്ത്രി നിര്‍മ്മലാ സീതാരാമനും കടുത്ത വെല്ലുവിളിയുണ്ടാകുമെന്നാണ് റിപ്പോര്‍ട്ട് പ്രവര്‍ചിക്കുന്നത്.
ഗ്രാമീണ സമ്പദ്വ്യവസ്ഥയ്ക്ക് തിരിച്ചടിയേറ്റതും നഗരത്തില്‍ തൊഴിലില്ലായ്മ വര്‍ധിച്ചതും സാധാരണക്കാരുടെ ജീവിതം ദുസ്സഹമാക്കി. ഗ്രാമീണതലത്തിലെ വേതനവര്‍ധന മന്ദഗതിയിലായി. 'ആഭ്യന്തര ആവശ്യം' കുറഞ്ഞതും ബാങ്ക് ഇതര ധനസ്ഥാപനങ്ങളുടെ വായ്പയിലെ ഇടിവും വന്‍ തിരിച്ചടിയായി. ഇന്ത്യന്‍ വാഹനവിപണി കൂപ്പുകുത്തിയത് ഇതിന്റെ പ്രതിഫലനമാണ്. മാന്ദ്യം നേരിടാന്‍ കോര്‍പറേറ്റ് നികുതി കുറച്ച കേന്ദ്രസര്‍ക്കാര്‍ നീക്കത്തിലും ലോകബാങ്ക് ആശങ്ക പ്രകടിപ്പിച്ചു. രണ്ടാംവര്‍ഷമാണ് വളര്‍ച്ചനിരക്ക് കൂപ്പുകുത്തുന്നത്. കഴിഞ്ഞ സാമ്പത്തികവര്‍ഷത്തെ വളര്‍ച്ച 6.9 ശതമാനമായിരുന്നു. നടപ്പ് സാമ്പത്തികവര്‍ഷം ഏഴര ശതമാനം വളര്‍ച്ച നേടുമെന്നായിരുന്നു തുടക്കത്തിലുള്ള പ്രതീക്ഷ. ഏപ്രില്‍-ജൂണ്‍ കാലയളവില്‍ വളര്‍ച്ച ആറുവര്‍ഷത്തെ ഏറ്റവും കുറഞ്ഞ നിരക്കായ അഞ്ച് ശതമാനമായി. ജൂലൈ-സെപ്റ്റംബറില്‍ വളര്‍ച്ച 5.3 ശതമാനം ആയിരിക്കുമെന്നാണ് റിസര്‍വ്ബാങ്ക് നിഗമനം. 2019ലെയും 2020ലെയും പ്രതീക്ഷിത വളര്‍ച്ച 0.3 ശതമാനം വീതം ഐഎംഎഫ് ജൂലൈയില്‍ വെട്ടിക്കുറച്ചു.
കഴിഞ്ഞ ഏപ്രിലില്‍ പ്രവചിച്ച 7.5 ശതമാനത്തില്‍ നിന്നാണ് വളര്‍ച്ചനിരക്ക് ലോകബാങ്ക് കുറയ്ക്കുന്നത്. പ്രത്യേകിച്ച് ഒരുക്കങ്ങളൊന്നുമില്ലാതെ ജി.എസ്.ടി. നടപ്പാക്കിയതും നോട്ട് അസാധുവാക്കിയതിന് പിന്നാലെ ഗ്രാമീണസമ്പദ്വ്യവസ്ഥയിലുണ്ടായ സമ്മര്‍ദ്ദവും നഗരമേഖലകളില്‍ തൊഴിലില്ലായ്മ വര്‍ദ്ദിച്ചതും സ്ഥിതി വഷളാക്കിയതായി റിപ്പോര്‍ട്ടില്‍ പറയുന്നു. രാജ്യത്തെ ദുര്‍ബലമായ സാമ്പത്തികമേഖലയെ കൂടുതല്‍ തകര്‍ച്ചയിലേക്കു തള്ളിവിടാന്‍ വളര്‍ച്ചയിലെ 'കടുത്ത' ഇടിവ് ഇടയാക്കിയേക്കുമെന്നും റിപ്പോര്‍ട്ടില്‍ സൂചിപ്പിക്കുന്നു. അന്താരാഷ്ട്ര നാണ്യനിധി(ഐ.എം.എഫ്.)യുമായി ചേര്‍ന്നുള്ള വാര്‍ഷിക സമ്മേളത്തിനു മുന്നോടിയായാണ് ലോകബാങ്ക് റിപ്പോര്‍ട്ട് പുറത്തിറക്കിയത്. തുടര്‍ച്ചയായി രണ്ടാമത്തെ വര്‍ഷമാണ് രാജ്യത്തിന്റെ സാമ്പത്തിക വളര്‍ച്ചനിരക്കില്‍ അവര്‍ കുറവുവരുത്തുന്നത്.
ദക്ഷിണേഷ്യയിലാകെ ഈ മാന്ദ്യം ബാധിച്ചിട്ടുണ്ട്. ആഭ്യന്തര ഉപഭോഗത്തിലെ കുറവാണ് ഇന്ത്യയുടെ തളര്‍ച്ചയ്ക്ക് മുഖ്യകാരണം. ഗ്രാമീണമേഖലയിലെ വരുമാനക്കുറവ്, ആഭ്യന്തരവിപണിയിലെ കുറഞ്ഞ ആവശ്യം, ബാങ്കിതര ധനകാര്യസ്ഥാപനങ്ങളിലെ വായ്പകളിലുണ്ടായ ഇടിവ് എന്നീ ഘടകങ്ങള്‍ ഉപഭോഗം കുറവായിത്തന്നെ തുടരുന്നതിന് ഇടയാക്കും. അവസാന പാദത്തില്‍ സ്വകാര്യ ഉപഭോഗത്തില്‍ 3.1% വര്‍ധനവാണുണ്ടായത്. കഴിഞ്ഞ വര്‍ഷം ഈ സമയം 7.3% ആയിരുന്നു. ഉല്‍പാദനമേഖലയില്‍ കഴിഞ്ഞ വര്‍ഷം ഈ സമയം 10% ആയിരുന്ന വളര്‍ച്ച ഈ വര്‍ഷം രണ്ടാംപാദത്തില്‍ ഒരു ശതമാനത്തിനും താഴേക്കു പോയി. വ്യവസായ ഉല്‍പാദനത്തിലെയും ഇറക്കുമതിയിലെയും ഇടിവും വിപണിയിലെ അസ്വസ്ഥതകളും കടുത്ത സാമ്പത്തിക മാന്ദ്യത്തിന്റെ സൂചനകളാണെന്നു റിപ്പോര്‍ട്ട് പറയുന്നു.
ഇന്ത്യയില്‍ എല്ലാ മേഖലകളെയും മാന്ദ്യം പിടിമുറുക്കിയിരിക്കുന്ന സാഹചര്യത്തില്‍ കൃത്യമായ പദ്ദതികള്‍ നടപ്പിലാക്കിയാല്‍ മാത്രമേ ഇതില്‍ നിന്നും പുറത്ത് വരാന്‍ ഇന്ത്യക്ക് സാധിക്കുകയുള്ളൂ. യുഎസ് ചൈന വ്യാപാരത്തര്‍ക്കം മുതലെടുത്തതാണ് ബംഗ്ലാദേശിന്റെ സമ്പദ്വ്യവസ്ഥ വളരുന്നത്. ബംഗ്ലാദേശിലെ തുണി വ്യവസായ മേഖല ഈ തര്‍ക്കത്തില്‍ നിന്ന് ഏറെ നേട്ടമുണ്ടാക്കി. ടൂറിസം മേഖലയിലെ കുതിപ്പു മൂലമുണ്ടായ നിര്‍മ്മാണങ്ങളും ജനങ്ങളുടെ വിനിയോഗ ശേഷിയിലെ വര്‍ധനയുമാണു നേപ്പാളിനെ 6.5% വളര്‍ച്ച കൈവരിക്കാന്‍ സഹായിച്ചത്. ഭൂട്ടാനില്‍ ടൂറിസം വളര്‍ച്ചയും ആഭ്യന്തര ഉപഭോഗത്തിലെ വര്‍ധനയുമാണ് വളര്‍ച്ചയ്ക്കു കാരണം. മാലദ്വീപില്‍ 5.2%, പാക്കിസ്ഥാനില്‍ 2.4%, ശ്രീലങ്കയില്‍ 2.7% എന്നിങ്ങനെയാണ് പ്രതീക്ഷിക്കുന്ന വളര്‍ച്ചനിരക്ക്.
