മുംബൈ: അവസാന മണിക്കൂറില്‍ നിക്ഷേപക താല്‍പര്യം വര്‍ധിച്ചതോടെ ഓഹരി സൂചികകള്‍ നേട്ടത്തില്‍ ക്ലോസ് ചെയ്തു. ഐടി ഓഹരികളിലെ കുതിപ്പാണ് സൂചികകളെ റെക്കോഡ് നേട്ടത്തിന് അര്‍ഹമാക്കിയത്. സെന്‍സെക്സ് 209.69 പോയിന്റ് ഉയര്‍ന്ന് 55,792.27ലും നിഫ്റ്റി 51.60 പോയിന്റ് നേട്ടത്തില്‍ 16,614.40ലുമാണ് വ്യാപാരം അവസാനിപ്പിച്ചത്. ദിനവ്യാപാരത്തിനിടെ സെന്‍സെക്സ് 55,855, നിഫ്റ്റി 16,628 എന്നിങ്ങനെ റെക്കോഡ് ഉയരം കുറിക്കുകയും ചെയ്തു.
ടാറ്റ കണ്‍സ്യൂമര്‍ പ്രൊഡക്ട്സ്, വിപ്രോ, ടെക് മഹീന്ദ്ര, നെസ് ലെ, ഹിന്ദുസ്ഥാന്‍ യുണിലിവര്‍ തുടങ്ങിയ ഓഹരികളാണ് പ്രധാനമായും നേട്ടമുണ്ടാക്കിയത്. ജെഎസ്ഡബ്ല്യു സ്റ്റീല്‍, ടാറ്റ മോട്ടോഴ്സ്, അദാനി പോര്‍ട്സ്, ഇന്‍ഡസിന്‍ഡ് ബാങ്ക്, കോള്‍ ഇന്ത്യ തുടങ്ങിയ ഓഹരികള്‍ നഷ്ടം നേരിട്ടു. നിഫ്റ്റി ഐടി, എഫ്എംസിജി സൂചികകള്‍ 1-2.5 ശതമാനം ഉയര്‍ന്നു. മെറ്റല്‍, പൊതുമേഖല ബാങ്ക് സൂചികകള്‍ രണ്ട് ശതമാനം താഴുകയും ചെയ്തു.
