മുംബൈ: തിരിച്ചടിയുടെ ദിനങ്ങളെ പിന്നിലാക്കി ആറാമത്തെ ദിവസം നേട്ടം തിരിച്ചുപിടിച്ച് വിപണി. കനത്ത ചാഞ്ചാട്ടത്തിന്റെ ദിനത്തിനൊടുവില്‍ ഓട്ടോ, പവര്‍, ബാങ്ക് ഓഹരികളുടെ കരുത്തില്‍ സൂചികകള്‍ നേട്ടത്തില്‍ ക്ലോസ് ചെയ്തു. നഷ്ടത്തിലാണ് വ്യാപാരം ആരംഭിച്ചതെങ്കിലും ഉച്ചയ്ക്കുശേഷം നേട്ടം തിരിച്ചുപിടിക്കാന്‍ വിപണിക്കായി. സെന്‍സെക്സ് 366.64 പോയിന്റ് ഉയര്‍ന്ന് 57,858.15ലും നിഫ്റ്റി 128.90 പോയിന്റ് നേട്ടത്തില്‍ 17,278ലുമാണ് വ്യാപാരം അവസാനിപ്പിച്ചത്.
ഓട്ടോ, ബാങ്ക് മേഖലകളിലെ കമ്പനികള്‍ മികച്ച മൂന്നാം പാദഫലങ്ങള്‍ പുറത്തുവിട്ടതാണ് സൂചികകള്‍ നേട്ടമാക്കിയത്. ആക്സിസ് ബാങ്കും മാരുതി സുസുകിയും സൂചികകളെ ചലിപ്പിച്ചു. എസ്ബിഐ, ഇന്‍ഡസിന്‍ഡ് ബാങ്ക്, യുപിഎല്‍ തുടങ്ങിയ ഓഹരികളും നേട്ടത്തിലാണ് വ്യാപാരം അവസാനിപ്പിച്ചത്. വിപ്രോ, ബജാജ് ഫിന്‍സര്‍വ്, ടൈറ്റാന്‍ കമ്പനി, ഇന്‍ഫോസിസ്, ടെക് മഹീന്ദ്ര തുടങ്ങിയ ഓഹരികള്‍ നഷ്ടം നേരിടുകയും ചെയ്തു. ഐടി ഒഴികെയുള്ള ഓഹരികള്‍ നേട്ടത്തിലായിരുന്നു. പൊതുമേഖല ബാങ്ക്, പവര്‍, ഓട്ടോ തുടങ്ങിയവ 2-4 ശതമാനം ഉയര്‍ന്നു. ബിഎസ്ഇ മിഡ്ക്യാപ്, സ്മോള്‍ ക്യാപ് സൂചികകളാകട്ടെ 0.8-1 ശതമാനം നേട്ടമുണ്ടാക്കി.
