മുംബൈ: തുടര്‍ച്ചയായി നാലാമത്തെ ദിവസവും ഓഹരി സൂചികകള്‍ നേട്ടത്തില്‍ ക്ലോസ് ചെയ്തു. നിഫ്റ്റി 11,900ന് മുകളിലെത്തി. ദിനവ്യാപാരത്തിനിടെ കനത്ത ചാഞ്ചാട്ടമാണ് വിപണി നേരിട്ടത്. നേട്ടത്തോടെ തുടങ്ങിയ സെന്സെക്സ് ഒരുവേള 280 പോയിന്റോളം താഴെപ്പോയി. പിന്നീട് അവസാന മണിക്കൂറിലാണ് നേട്ടം തിരിച്ചുപിടിച്ചത്.
ഒടുവില്‍ സെന്സെക്സ് 162.94 പോയിന്റ് നേട്ടത്തില്‍ 40,707.31ലും നിഫ്റ്റി 40.90 പോയിന്റ് ഉയര്‍ന്ന് 11,937.70ലുമാണ് വ്യാപാരം അവസാനിപ്പിച്ചത്. ബിഎസ്ഇയിലെ 1354 കമ്പനികളുടെ ഓഹരികള്‍ നേട്ടത്തിലും 1269 ഓഹരികള്‍ നഷ്ടത്തിലുമായിരുന്നു. 165 ഓഹരികള്‍ക്ക് മാറ്റമില്ല.
പവര്‍ഗ്രിഡ് കോര്‍പ്, ഭാരതി എയര്‍ടെല്‍, ടാറ്റ സ്റ്റീല്‍, ഹിന്‍ഡാല്‍കോ, ഗെയില്‍ തുടങ്ങിയ ഓഹരകളാണ് പ്രധാനമായും നേട്ടമുണ്ടാക്കിയത്. ബ്രിട്ടാനിയ, ടിസിഎസ്, എസ്ബിഐ ലൈഫ്, ഹീറോ മോട്ടോര്‍കോര്‍പ്, എച്ച്ഡിഎഫ്സി ലൈഫ് തുടങ്ങിയ ഓഹരികള്‍ നഷ്ടത്തിലുമാണ് വ്യാപാരം അവസാനിപ്പിച്ചത്. ലോഹ സൂചിക രണ്ടുശതമാനത്തോളം ഉയര്‍ന്നു. ബാങ്ക്, അടിസ്ഥാന സൗകര്യവികസനം, ഊര്‍ജം എന്നീ വിഭാഗങ്ങളിലെ സൂചികകളും നേട്ടമുണ്ടാക്കി. ഐടി, വാഹനം, എഫ്എംസിജി ഓഹരികള്‍ കനത്ത വില്‍പന സമ്മര്‍ദത്തിലാകുകയും ചെയ്തു.
